300 events in program pe gnove edizion di UdinEstate

Martars ai 4 di Jugn e je stade presentade la gnove edizion di UdinEstate che intai passe trê mês de sô durade e viôt in program sù par jù 300 events. Il cûr des iniziativis e sarà la cort di palaç Morpurgo (vie Savorgnane), ma spetacui, incuintris, presentazions, mostris, visitis, proiezions, concierts e apontaments varis a cjataran acet ancje intes placis XX Settembre, S. Jacum e dal Domo, in plui che intes circoscrizions, intai parcs e in altris lûcs de citât. Plui di trente lis realtâts culturâls cjapadis dentri intal inmaneâ la edizion 2013 di UdinEventi, cence contâ la biblioteche civiche Joppi, i museus, la Ludoteche, i uficis comunâi e lis circoscrizions. I apontaments a son di ogni sorte, si va des rassegnis tant che la Gnot blancje, Udin&Jazz, Dulinvie, Homepage festival, il progjet di teatri furlan e Teatro San Giorgio Estate a km 0, Folkest, il festival de ghitare e chel dai artiscj di strade fintremai ai apontaments cun “Armonie in corte”, “Cittadini in movimento”, “Dialoghi in biblioteca” e “Letture in corte”. A son po lis vistis par cognossi plui a fonts la citât, lis seradis di cine (CineInCittà) e i moments ducj dedicâts ai fruts. Dongje dai tancj apontaments musicâi si varà ancje la liriche in place cul “Attila” di Giuseppe Verdi e i spetacui di danze de compagnie AreaRea. Spazi po intal program ancje pal sport cun ciclisim, basket, roller, podisim, cicloturisim e altri ancjemò. Par garantî dut chest program a son stâts invistîts sù par jù 73 mil euros e si à vût il contribût de Fondazion Crup e di Amga. Chest an – al à dite intent de presentazion il sindic Furio Honsell – si à pontât une vore sul valorizâ lis realtâts e i artiscj locâi. L’impegn de aministrazion comunâl – al à zontât l’assessôr pe culture Federico Pirone – al è stât chel di dâi une suaze dulà che la pluralitât des propuestis culturâls, educativis e di animazion che a rivin dal teritori a puedin esprimisi. Par vê informazions plui in detai sul program si pues lâ sul sît internet dal Comun o telefonâ al PuntoInforma al 0432 414717.