Il progjet

Il furlan tant che lenghe di comunicazion “normâl”, par dut e par ducj. E je cheste la idee che e sta daûr di “Udin par Furlan” , progjet integrât di comunicazion e di informazion in lenghe furlane dal Comun di Udin.

Ce isal?
Al è un progjet di comunicazion e di informazion in lenghe furlane su lis ativitâts istituzionâls dal Comun di Udin e su ce che al nas e al cres in citât.

Cheste ativitât e je une di chês che a vegnin metudis in vore cul jutori de Leç n. 482 dai 15 di Dicembar dal 1999, Normis in materie di tutele des minorancis linguistichis storichis, par garantî l’ûs de lenghe furlane, dongje di chê taliane, te comunicazion istituzionâl e te informazion pai citadins e plui in gjenerâl cun chê di promovi l’ûs public e sociâl dal furlan.

Parcè?
Cul progjet “Udin par Furlan” si slargje e si insiore la ufierte informative e di comunicazion dal Comun di Udin, cjapant dentri iniziativis specifichis coordenadis fatis in lenghe furlane cun chê di promovi la informazion e la partecipazion dai citadins e l’ûs de lenghe furlane tant che imprest di comunicazion contemporani e normâl.

Cun “Udin par Furlan” a vegnin metudis in vore lis previsions de Leç 482/1999 sul ûs public des lenghis des minorancis linguistichis storichis e duncje il principi de tutele che al è proferît tal articul 6 de Costituzion de Republiche taliane.

Cemût?
Il progjet “Udin par Furlan” al è svilupât su diviersis azions che a son metudis adun in maniere integrade e che a cjapin dentri radio, internet, tv e cjarte stampade.
In radio “Udin par Furlan” al previôt gnovis che si cjatin dentri de programazion informative (Gjornâl Radio e Ce fâ) di Radio Onde Furlane (a Udin sui 90 Mhz in modulazion di frecuence e in rêt ae direzion www.ondefurlane.eu) e di une rubriche di aprofondiment tematic setemanâl (che il so titul al è propit Udin par Furlan), in onde la sabide a 11 e la domenie in repliche a 2 dopodimisdì.
Su la rêt “Udin par Furlan” al è disponibil su la direzion www.udinparfurlan.eu . Si trate di un sît che al da fûr gnovis e aprofondiments in formât sei testuâl che multimediâl, ven a dî lis trasmissions setemanâls di Radio Onde Furlane e chês radiofonichis e televisivis leadis a events citadins specifics. E je garantide une buine acessibilitât par ducj i contignûts, in graciis di un sisteme di archiviazion e di ricercje par categoriis tematichis e par vie dal ûs di un sisteme di gjestion “responsive” che al adate il sît ancje ai dispositîfs mobii e su smartphone.

“Udin par Furlan” e i events speciâi su radio, rêt, television e cjarte stampade. Par sîs manifestazions specifichis che si davuelzin a Udin vie pal an, “Udin par Furlan” al met in vore une azion informative e di comunicazion coordenade in lenghe furlane, che e partìs de creazion di une postazion radiofoniche tal puest là che si davuelç l’event. Cussì e ven fate une programazion radio di pueste, anticipade di une campagne di spots publicitaris e di altri materiâl di informazion che al è disponibil sul sît www.udinparfurlan.eu. I sîs events che a saran selezionâts a saran cuvierzûts ancje su lis pagjinis da Il Diari e par television su Telefriuli dentri di rubrichis specifichis riferidis al progjet “Udin par Furlan”.

Cui?
Il progjet “Udin par Furlan” al è metût adun de cooperative Informazione Friulana par cont dal Comun di Udin.