Ricevude la regjistrazion Emas dal ministeri pal ambient

Il Comun al à ricevût dal ministeri talian pal ambient la regjistrazion Emas (sisteme di ecogjestion e di verifiche ambientâl), che si zonte ae certificazion Iso 14001 cjapade intal 2010. Al è il risultât di un lavôr lât indenant par trê agns e tacât intal 2008 cu la certificazion dal dipartiment teritori e ambient dal Comun. La regjistrazion Emas, e spieghe la aministrazion comunâl, e permet di definî carateristichis e obietîfs di miorament par meti dentri pardabon l’ambient tra lis variabilis strategjichis, ma ancje di organizâ, miorâ e comunicâ lis prestazions ambientâls, di maniere di contribuî a sbassâ l’incuinament e, in gracie di un ûs plui eficient des risorsis, ancje lis spesis. Il sisteme Emas al opere con doi struments: Opendata, ven a stai l’acès cence limitazions de bande dai citadins ai dâts sul stât di salût ambientâl e energjetiche de citât; e Epart, il servizi in rêt dulà che si puedin segnalâ lis criticitâts dal teritori citadin.