Si slargje ancjemò la rêt dai orts urbans

Cun cuatri strops gnûfs inte aree di vie Zucchi, a cressin ancjemò i orts urbans di Udin. I tocs gnûfs a son il risultât dai studi di riforme di chê aree curât dal ufici Agjende 21 in cunvigne cul Servizi infrastruturis dal Comun. I strops metûts a disposizion di fameis e associazions in vie Zucchi a deventin cussì 18 e a van a zontâsi a chei logâts intes viis Bariglarie, Zugliano e Pellis par un totâl di passe 70 tocs di tiere. I strops, che a àn une superficie tor dai 30 metris cuadrâts, a son assegnâts in Autun cuntun bant public e a previodin une concession di cinc agns cuntun cjanul di 48 euros par an, là che a son za dentri i coscj pe aghe, pe curint e pe manutenzion de aree. In plui dai prodots che si puedin coltivâ, i orts a ufrissin une ocasion par socializâ, par fâ ativitât fisiche e pe sperimentazion didatiche.