Nassûts par lei, une setemane fisse di apontaments

A son dodis i apontaments dedicâts ae leture pai frutins in program a Udin inte suaze de Setemane regjonâi di “Nati per Leggere” (Nassûts par lei). Cun di fat, dai 16 ai 24 di Novembar ancje la biblioteche civiche “Joppi”, intune cu la sezion pai fantats e cu lis bibliotechis di circoscrizion, e partecipe al progjet cun diviersis iniziativis di leture a vôs alte dedicadis ai fruts che, tra lis altris, a cjapin dentri ancje lenghe furlane, lenghis forestis, art e cine. A screâ la setemane al è un dopli apontament in program lunis ai 18 di Novembar. A cinc mancul un cuart di dopomisdì (16.45) inte biblioteche de Seste Circoscrizion i letôrs volontaris dal club “Tileggounastoria” a proponin un gnûf incuintri cun “Gli Acchiappastorie – Storie mangione”. A cinc (17.00) invezit la sezion fantats de “Joppi” i da acet a di une gnove pontade di “Tantilibri” dedicade ai fruts dai 18 ai 36 mês e aes lôr fameis. In plui dai apontaments in calendari, dilunc vie de setemane, e sarà in vore la campagne par regalâ un libri a “Nati per leggere” imbastide cul jutori des librariis Feltrinelli, Friuli, Giunti, Moderna, Pecora Nera e Ubik. Dai 16 ai 24 di Novembar, alì de sezion fantats de “Joppi”, si varà ancje la mostre “Irrinunciabili 2013. Il program detaiât de Setemane si lu cjate alì dal sît internet de sezion fantats de biblioteche (www.sbhu.it/udine/ragazzi). Par informazions si pues ancje clamâ il 0432 271585.