Domande par cinc progjets di lavôr di utilitât publiche

La Zonte comunâl e à fate buine la domande indreçade ae Regjon par finanziâ cinc progjets di lavôr di utilitât publiche che a interessaran in dut disevot lavoradôrs e, plui intal specific, dîs impleâts e vot operaris. I progjets a àn une durade massime di vot mês e un orari setemanâl di 32 oris. A gjoldi di cheste iniziative a puedin jessi i lavoradôrs residents in Friûl – Vignesie Julie che a son in stât di disocupazion di almancul vot mês, che no àn nissun gjenar di amortizadôr sociâl e no son titolârs di pension, e che a son intes listis di disponibilitât metudis sù alì dai Centris pal implei. Il cost totâl dai progjets fats indenant di Palaç D’Aronco al è di sù par jù 432 mil euros, pal 90% a caric de Regjon e pal 10% dal Comun. I lavoradôrs a saran po impegnâts in setôrs diferents che a puedin lâ dai servizis di custodie dai implants sportîfs comunâi ae valorizazion dai bens culturâi, dal jutori aes ativitâts istituzionâls ae schedadure di documents.