Variazion di belanç fate buine in Zonte

Inte riunion di vuê la Zonte comunâl e à fate buine la variazion di belanç. Tra lis vôs principâls si cjate la contabilizazion dal contribût regjonâl di 280 mil euros pai lavoradôrs di utilitât sociâl che si zontin ai 100 mil euros metûts dal Comun. Altris 150 mil euros a van invezit a judâ lis fameis che a vivin in cundizions di disasi pal paiament de tarife pal smaltiment des scovacis. A son po 40 mil euros pes iniziativis leadis al Ultin dal an, 25 mil tant che contribût ae Provincie di Udin par cjoli mieçs pai malâts di Sla e 20 mil euros pai intervents in câs di nêf. “In vie preventive – e spieghe la assessore Cinzia Del Torre – a son stâts previodûts ancje uns 25 mil euros par contribuî al progjet de Cjase des feminis in vie Pradamano”.