Acuardi cui sindacâts cuintri de violence su lis feminis

Dopo dal servizi di reperibilitât 24 oris su 24 inviât tal mês di Setembar adun cu lis fuarcis di polizie, la aministrazion comunâl e va indenant cul so program di iniziativis cuintri de violence su lis feminis cu la firme, vinars ai 22 di Novembar alì de Cjase de Contadinance, di un document proponût di Cgil, Cisl e Uil. Il progjet si propon in particolâr di fâ e di meti in vore sinergjiis saldis tra i diviers ents par rivâ a di un sisteme unitari di servizis indreçâts aes feminis e ai fruts che a àn patît violence, ma ancje di meti in at intervents di prevenzion e di informazion par promovi la culture di gjenar e il rispiet intes relazions tra om e femine, ancje cul coinvolziment des scuelis. I sindicâts si impegnaran ancje a cjatâ, par mieç de contratazion di secont nivel, struments adats par frontâ il teme de violence e dal benstâ sul puest di vore e par promovi cuotis di inseriment lavoratîf a pro des feminis che a cirin di saltâ fûr di situazions di violence, cun chê di rivâ ae lôr emancipazion economiche.