Iscrizions viertis pai cors di lenghe taliane e slovene

Cun lunis ai 25 di Novembar al sarà pussibil iscrivisi ai gnûfs cors di lenghe e di culture taliane par forescj e a chei di lenghe e di culture slovene. Lis personis interessadis a puedin indreçâsi ai sportei des circoscrizions 2e, 3e, 4e, 5e, 6e e 7e tai oraris di viertidure al public: il lunis di 10 di matine a 2 dopomisdì, dal martars al vinars di 8. e mieze di matine a misdì e mieç, e la joibe ancje di 3 a 6 dopomisdì. I apontaments informatîfs su la lenghe e su la culture taliane par migrants a son vierts par un numar massim di 24 personis e a tacaran ai 3 di Dicembar par sierâsi cul Fevrâr dal 2014. Lis lezions si tignaran te sale de circoscrizion di vie Chinotto intes zornadis di martars e di vinars di 6 a 8 e mieze sot sere. I incuintris di lenghe e di culture slovene invezit a saran screâts ai 2 di Dicembar par sierâsi intal Fevrâr di chest an che al ven. I apontaments si davuelzaran te sale dal centri parochiâl in vie Genova a Godie il lunis di 8 e mieze a 10 e mieze. Par altris informazions si pues contatâ il PuntoInforma di vie Savorgnane, 12 (tel 0432.414717/18 o www.comune.udine.it).