Viertiduris di domenie, il Comun al ricor al Consei di Stât

“Cheste aministrazion e à simpri mostrât la volontât politiche di limitâ lis viertiduris intai dîs di fieste par rispiet des fameis e dai lavoradôrs e par fâi cuintri a di un model culturâl negatîf ancje pai stes utents, leât a di un consumisim cence brenis”. A dîlu al è il sindic Furio Honsell par comentâ la cuistion dal risarciment pal supermarcjât Panorama su lis viertiduris di domenie. “Il Comun nol vûl lâ daûr di une logjiche che e propon viertiduris indiscriminadis e une corse sfonsade al consumâ – al à zontât il prin citadin – ma proponi un model diferent come chel dal centri comerciâl naturâl che al ufrìs ai siei visitadôrs, in plui des buteghis, ancje une propueste culturâl siore e varie”. Par chest, dopo des sentencis dal TAR che prime a àn anulât la ordenance comunâl che e limitave lis viertiduris di domenie pai ponts vendite no alimentârs des areis Nord e Ovest de citât e po fate buine la domande di risarciment presentade dal supermarcjât Panorama, la Aministrazion comunâl e à decidût che e ricorarà al Consei di Stât. Pe avocadure dal Comun a son lis fondis par rivâ a ribaltâ la sentence dal TAR e a scancelâ cussì ancje la domande di risarciment.