Presentât il program des iniziativis pal Nadâl udinês
Il calendari di iniziativis in program a Udin par Nadâl al è stât presentât vuê a Palaç D’Aronco dal sindic Furio Honsell e dai assessôrs Alessandro Venanzi, Federico Pirone e Antonella Nonino. No si fevele dome di cualchi apontament sot Nadâl – al è stât dite intant de presentazion – ma di un mês di Dicembar plen di iniziativis e di events che il Comun al rivât a imbastî in gracie de poie di Confartesanât, CNA, Cjamare di Cumierç, Confcumierç, UdineIdea, e de colaborazion cul Teatri “Giovanni da Udine”, cu la associazion “Albergatori Udinesi”, cun “Amici di via Mercatovecchio” e cu lis Feroviis Udin – Cividât. “Ancje intun moment di recession economiche nus someave just ufrî un program siôr pes fiestis di Nadâl – al à spiegât il sindic – parcè che o volìn cjalâ al futûr cun sperance e mandâ un segnâl di otimisim”. Tra concierts, spetacui di teatri e di bal, iniziativis pai fruts, mostris, conferencis, presentazions e fiestis di cuartîr, i apontaments in program a son plui di un centenâr: la liste complete dai events di “Dicembar a Udin” si le cjate sul sît internet dal Comun ae direzion www.comune.udine.it , sul sît www.udinecultura.it o alì dal PuntoInforma di vie Savorgnane. Tra i apontaments plui spietâts a son il marcjât di Nadâl de Confartesanât che chest an si tignarà in place Sant Jacum, il marcjât di Sante Luzie che dai 12 ai 15 di Dicembar al cjaparà dentri lis viis Vittorio Veneto, Stringher, Savorgnane e place dal Domo. Ta cheste place al cjatarà acet ancje il bosc dai arbui cul trenin pai fruts, intant che i doi arbui di Nadâl principâi a saran piâts in place Libertà e in borc Portanuova. L’ultin dal an al proponarà il conciert in Zardin Grant cui fûcs sù in cjistiel, intant che ai 6 di Zenâr no mancjaran i pignarûi impiâts intai cuartîrs de citât. Tra i apontaments si puedin ricuardâ ancje il speciâl di “Suns” dedicât ae gnove musiche furlane in program il prin di Dicembar a 5 e mieze dopomisdì (17.30) alì dal Palamostre; la serade dedicade al poete Pierluigi Cappello che si tignarà ai 5 di Dicembar a partî di vot e mieze (20.30) simpri al Palamostre; il conciert di beneficence “Gospel alle stelle” in calendari ai 7 di Dicembar a nûf di sere (21.00) alì dal “Giovanni da Udine”; il Gala internazionâl di danze pe Crôs Rosse che si davuelzarà la zornade intal stes teatri tor nûf mancul un cuart di sere (20.45); e la edizion numar 13 dal premi “Udine città della Pace” in program ai 19 di Dicembar a cinc e mieze dopomisdì (17.30) in sale Ajace.