Sabide e Domenie, la gnove musiche furlane al Palamostre

Udin e devente par doi dîs la capitâl de musiche furlane. Cun di fat sabide ai 3 di Novembar a tacâ di 9 di sere, alì dal teatri Palamostre, si tignarà la finâl de edizion 2013 dal Premi Friûl, concors inmaneât di passe trente agns di Radio Onde Furlane. Il Premi, inmaneât cu la poie de Agjenzie Regjonâl pe Lenghe Furlane e dal Comun di Udin, al metarà a confront sîs formazions: Mataleao, Terenzio Blues Band, Aldo Sbadiglio e la famiglia Ananas in vacanza a Dresda, Truc, Sons of a Gun e l’Ensemble d’Anjou. Ospits speciâi i Carnicats che, pe ocasion, a proponin il lôr ultin lavôr cuntun grup di musiciscj dal vîf. Domenie prin di Dicembar, invezit, simpri alì dal Palamostre, e rive Musiche*. L’apontament, inmaneât de associazion Il Laboratorio cu la poie dal Comun, al propon la presentazion uficiâl di ‘Suns. Antologjie de gnove musiche furlane’ (antologjie in 3 cd publicâts di Nota e ARLeF) e i concierts di Mitili FLK, Arbe Garbe, Lino Straulino e Luigi Maieron. In ducj i doi câs la jentrade e je libare. Cun di plui, inte suaze dal progjet Udin par furlan, i doi events a saran trasmetûts in direte su lis frecuencis di Radio Onde Furlane (90 Mhz e www.ondefurlane.eu).