Classifiche su la cualitât de vite, il coment dal sindic

Daûr tradizion, il cuotidian Il Sole 24 Ore al à publicât la classifiche su la cualitât de vite intal stât talian. Chest an, la provincie di Udin – là che il comun di Udin al rapresente un cuint de popolazion – si cjate al vincjenovesim puest. Udin si cjate intes primis posizions in cjamps tant che servizis, ambient, salût e ordin public, intant che in altris câs si cjate in posizions di mieze o basse classifiche, par esempli par disposizion a invistî e je al cuarantesisesim puest e par spirt di iniziative al sessantenovesim. Pal sindic di Udin, Furio Honsell, si trate di dâts che a van cjapâts cuntune cierte cautele. “Di là dal tornâ a dî, cemût che ai simpri dite, che chest zûc de classifiche al lasse il timp che al cjate – al à comentât il prin citadin udinês – al fâs plasê di notâ che tra i aspiets positîfs si vedin i indicadôrs su sigurece, servizis pe persone e ambient, o sei propit chei temis che tant che aministrazion o vin simpri pontât cul cirî di promovi stîi di vite sans, atîfs e sostignibii”.