I dissens di Barbara Jelenkovich a palaç Morpurgo

E sarà screade miercus ai 4 di Dicembar a sîs sot sere (18.00) a palaç Morpurgo la mostre “Le illustrazioni di Barbara Jelenkovich”, esposizion che e propon une colezion largje di dissens origjinâi de ilustradore specializade in dissens par fruts dai doi ai sîs agns. Barbara Jelenkovich, che e vîf e e lavore a Udin, e à metût adun in trente agns di lavôr plui di 130 libris, e je stade publicade in vincjecinc lenghis e la sô opare e ven preseade in dut il mont. La mostre, logade alì des Galariis dal Progjet, e nas di une colaborazion cu la Università della LiberEtà di Udin e cu la Pro Loco di Vençon. Ae scree de iniziative a parteciparan ancje l’assessôr comunâl pe culture Federico Pirone, il diretôr dai Museus Civics Marco Biscione e la presidente de Università della LiberEtà del Fvg Giuseppina Raso. La mostre e restarà vierte fintremai i 12 di Zenâr e si podarà viodile di vinars, di sabide e di domenie di trê a sîs dopomisdì (15.00 – 18.00). Cun di plui, dongje de mostre, si varan ancje doi laboratoris pai fruts: il prin vinars ai 6 di Dicembar a 4 dopomisdì cun titul “S. Nicolau e il piçul Krampus” e il secont sabide ai 4 di Zenâr, simpri a 4 dopomisdì, cun titul “Ce isal daûr dal barcon? Creìn ilustrazions cu lis barconetis”.