“Dicembar a Udin” al jentre intal vîf

Dopo dai prins apontaments, al jentre intal vîf “Dicembar a Udin”, il cartelon cu lis iniziativis inmaneadis dal Comun par compagnâ udinês e turiscj dilunc des fiestis di Nadâl. La partence uficiâl e je segnade de cerimonie par impiâ l’arbul di Nadâl in place Libertà sabide ai 7 di Dicembar a misdì. Lis lûs dal peç a saran impiadis cu la partecipazion de presidente de Regjon Debora Serracchiani, dal governadôr de Carinzie Peter Kaiser, dal sindic Furio Honsell, dal assessôr pes ativitâts produtivis Alessandro Venanzi, e dal predi de parochie dal Domo Luciano Nobile pe benedizion. A compagnâ la cerimonie e sarà la orchestre carinziane, une rapresentance di fruts des scuele elementâr IV Novembre e une delegazion dal ERSA dal Friûl – Vignesie Julie.

Za vinars ai 6 di Dicembar però il program al è siôr di apontaments. A 11 di matine, intal salon dal Parlament si presente al public la riedizion digjitâl de opare di Giacomo Porta su lis memoriis des antighis cjasis di Udin. A 5 dopomisdì si varà la scree dal bosc di Nadâl e dal percors pai fruts in place dal Domo, a 5 e mieze dopomisdì in place S. Jacum al partìs il marcjât di Nadâl metût sù de Confartesanât cu la presince ancje de corâl gospel dal liceu Marinelli direzût dal mestri Rudy Fantin. Ae stesse ore, ma a Cjase Cavazzini, si varà la presentazion dai cuatri artiscj che a partecipin ae edizion 2013 dal premi “In Sesto. Scultura e installazione a San Vito al Tagliamento”.

Sabide, in plui di impiâ l’arbul di Nadâl, si varan ancje altris iniziativis. A nûf di sere alì dal teatri Giovanni da Udine al è in program il conciert di beneficence “Gospel alle stelle”. Simpri di sere, ma a nûf mancul un cuart, alì dal Palamostre, si varà il spetacul teatrâl “Il finto malato” cu la compagnie “Assemblea Teatrale Maranese”. A sîs sot sere inte aree verde Peter Pan in vie Brazzà si tignarà la iniziative “Atmosfere di Natale”. A cuatri e mieze dopomisdì alì de galarie “Tina Modotti” e je in calendari la scree de mostre “Riusografie, dal negativo al positivo con il riutilizzo creativo” metude adun dal grup Flickr Udin e di Future Factory. A cuatri dopomisdì in place S. Jacum si varà il conciert “Note di Natale” cu la corâl VocInVolo.