Fat bon il belanç ambientâl pal 2012

Il Comun al à fat bon il belanç ambientâl pal 2012, o sei il document che al certifiche i compuartaments ambientâi a nivel di teritori e di aministrazion comunâl. “La sostignibilitât e la eficience energjetiche a son stâts tra i obietîfs centrâi intai ultins sîs agns di ativitât aministrative – al à spiegât il sindic, Furio Honsell – e di chest belanç si pues viodi cemût che, almancul par chel che al rivuarde il patrimoni comunâl, o sin rivâts ai obietîfs europeans previodûts pal 2020, massime sul front de riduzion dal 20% des emissions di Co2”. Intal studi a son cjapadis in esam nûf grandis areis, ven a dî: vert urban, mobilitât, risorsis idrichis, svilup urban, energjie, scovacis, gnûf guvier dal teritori, salût publiche, ecuitât sociâl. Par ognidune di chestis categoriis si à valutât sei a nivel cualitatîf, sei a nivel di spese, il pês des diviersis ativitâts che il Comun al puarte indenant. Tra i indicadôrs economics si pues viodi che intal 2012 il Comun al à spindût une cuote di passe 20 milions dal so belanç par spesis ambientâls, come a dî che cuasi il 20% des sôs risorsis a son impegnadis par azions indreçadis ae sostignibilitât ambientâl e al sparagn energjetic. Par esempli, vie pal 2012, si à spindût cuasi 1,9 milions pal vert urban, intant che pe mobilitât sostignibile, tra 2010 e 2012, a son lâts 2,3 milions. Sul front dai sparagns tra 2008 e 2012 il consum di aghe si è sbassât sei a nivel teritoriâl, sei a nivel di ent. Inte stesse dade la racuelte diferenziade e je passade dal 45,1% al 65,9%, il numar di arbui plantâts in citât al è aumentât di cuasi 10 mil unitâts e i percors ciclabii a son cressûts di 33 a 37 chilometris. La aministrazion comunâl e à vût po une diminuzion marcade intal consum di energjie eletriche e de cjarte, e une riduzion intal ûs di veicui incuinants.