Screât il marcjât di Nadâl in place S. Jacum

Al è stât screât in maniere uficiâl ai 6 di Dicembar il marcjât di Nadâl de Confartesanât in place Sant Jacum. Ae scree a àn partecipât il president de Confartesanât di Udin Graziano Tilatti, il sindic Furio Honsell e l’assessôr comunâl pes ativitâts produtivis e turistichis Alessandro Venanzi, che pôc prime a vevin screât ancje il bosc di Nadâl e i zûcs par fruts in place dal Domo. A son 19 in dut lis impresis che a àn acet intes cjasutis metudis sù in place, là che fin ai 24 di Dicembar si podaran cjatâ tantis ideis pai regâi di Nadâl: de cjocolate ai distilâts, des ceramichis artistichis fatis a man ai infûs, des zoiis ae blancjarie pe cjase, cence dismenteâ po artesanât etnic, presepis in len, panetons e tancj altris articui di regâl. La iniziative, nassude de colaborazion tra Comun e Confcumierç e cu la poie de Bancje di Udin, e je compagnade di un program di animazion cun corâls gospel e musiche di Nadâl, zûcs pai fruts, spetacui e diviersis altris ativitâts par rindi ancjemò plui vivarôs il centri de citât dentri des fiestis.