Al è in rêt l’archivi su lis cjasis antighis de citât

Si è tignude vinars ai 6 di Dicembar in cjistiel la cerimonie di consegne ae citât dal archivi in rêt “Memoriis su lis cjasis antighis di Udin di Giovanni Battista della Porta: un archivi viert pe cognossince de citât storiche” publicât de editore Forum. Il lavôr, curât di Anna Frangipane ricercjadore dal Dipartiment di inzegnarie civîl e architeture de Universitât di Udin, al è stât pussibil in graciis dal finanziament dal Consei notarîl dai distrets di Udin e di Tumieç e de Associazion notarîl furlane e cu la colaborazion dal Comun di Udin, dal Archivi di stât, de sezion manuscrits de biblioteche civiche e dai museus civics di Udin che a àn viert i lôr locâi ai studiôs e dât la autorizazion al acès libar ai documents. Di chi indenant al sarà cussì pussibil scuvierzi la architeture, la storie e lis vicendis di 2 mil e 100 cjasis dal centri storic de citât e di un centenâr di edificis publics e religjôs par mieç di un archivi in rêt chel al pues jessi consultât a partî dal sît de biblioteche comunâl Joppi.