Vie libare pal recupar de aree ex Domenichelli

La Zonte comunâl e à fât bon il Plan di Azion Comunâl di iniziative privade pe aree des viis Nogara e della Faula. Il progjet al permetarà in curt di vê ta chê zone un pont di incuintri impuartant pai students, ma ancje areis verdis, pistis ciclabilis e un gnûf distributôr pes machinis a metan. Fin cumò no si veve mai metût in vore un intervent di chest nivel che al met adun dibisugnis sei dal public che dal privât, al à dit il vicesindic e assessôr pe planificazion teritoriâl Carlo Giacomello. Il PAC, che al domande un invistiment di sù par jù 5 milions di euros, al previôt tant che element principâl dal progjet 1.900 metris cuadris di vert di urbanizazion primarie e passe 2.700 metris cuadris di vert di urbanizazion secondarie che a cjaparan dentri dôs gruessis zonis: la aree ex Atm di proprietât de Saf e la ex Domenichelli di vie Galilei di proprietât dal grup imobiliâr Monte Mari.