Si scree vinars la mostre “Stars & Stripes”

Dal Espressionisim astrat fin ae Pop Art. Dut chest e altri ancjemò al è ce che si cjate inte colezion Friam che e met adun lis oparis regaladis dopo dal taramot dal 1976 di un grup di artiscj americans cun chê di tirâ sù bêçs pe ricostruzion. Propit i lavôrs di cheste colezion a son al centri de mostre che si screarà vinars ai 13 di Dicembar a sîs sot sere (18.00) a Cjase Cavazzini e che e à par titul “Stars & Stripes. Arte americana dagli anni Settanta”. Dopo di une mostre a palaç D’Aronco intal 1980, la racuelte Friam e je stade esponude a rotazion e dome in piçule part intal museu di art moderne di Udin: cheste e je duncje une ocasion par tornâ a proponi ae atenzion dal public buine part de colezion là che a son testemoneâts un pôcs dai moviments artistics plui impuartants dai Stâts Unîts. La mostre e restarà vierte fintremai i 30 di Març di chest an che al ven dal martars ae domenie, di dîs e mieze di buinore a 5 dopodimisdì (10.30 – 17.00), e i vinars e lis sabidis fin siet sot sere (10.30 – 19.00). Cun di plui, domenie ai 22 di Dicembar e domenie ai 5 di Zenâr di undis di matine a misdì a son in program dôs visitis vuidadis (cun prenotazion obligatorie, tel. 0432.414749) al cost di 5 euros, intant che sabide ai 28 di Dicembar di trê a cinc dopomisdì (15.00 – 17.00) si varà un laboratori didatic viert ai fruts dai 6 ai 10 agns.