Passe 6 mil coridôrs par Telethon

Vincjecuatri oris di corse par tirâ sù fonts pe ricercje sientifiche cuintri des malatiis gjenetichis raris. Si fevele de stafete Telethon 24 par une ore che si invie vuê a Udin a tacâ di 5 dopodimisdì e che e rivarà insom ae stesse ore di doman. La edizion di chest an, tra l’altri, e propon un percors gnûf che al viodarà Marcjât Vieri tant che pont di partence e di rivade, e che e cjaparà dentri ancje lis viis Sarpi, Valvason, Zanon, Poscolle, Cavour e place Libertà. 263 lis scuadris che a àn aderît, une cifre inmò plui grande di chê dal an passât e che, dome come coridôrs, e puartarà pes stradis di Udin plui di 6 mil personis. Sul front logjistic, in gracie de disponibilitât de proprietât, i coridôrs a podaran doprâ par cambiâsi i spazis de ex Upim, intant che lis postazions pes scuadris che a partecipin ae corse a saran intai spazis denant dal pont informatîf di TurismoFvg, in Zardin Grant.