Presentade la seconde fase di “CamminaMenti”

Ai 18 di Dicembar a palaç D’Aronco e je stade presentade la seconde fase dal progjet “CamminaMenti… le menti in cammino” che si inviarà a Udin cul mês di Fevrâr dal 2014. Su dut il teritori comunâl a saran svilupadis tantis gnovis ativitâts e iniziativis indreçadis aes personis cun plui di 65 agns. Si fevele di apontaments dedicâts a tradizions popolârs, matematiche, storie de citât, botaniche e micologjie, percors di biomusiche e bonstâ psicofisic, laboratoris creatîfs, interculturâi e di discussion, concierts e events musicâi, e percors par scuvierzi la citât tra aghis, vert e orts urbans. Il progjet al è promovût dal Comun par mieç dal ufici “Citâts Sanis”, dal Distret di Udin de de Aziende pai Servizis Sanitaris e de associazion Alzheimer cul jutori di diviersis realtâts ativis sul teritori tant che lis Circoscrizions, la Biblioteche Civiche, la Ludoteche, Agenda21, la associazion “Amici della Musica”, il grup “Noi Psicologi”, Mathesis, la associazion “Alice”, la UCAI, la Associazion Micologjiche Udinese, la associazion “Judìnsi”, e la cooperative “Pervinca”. La iniziative e previôt po di cjapâ dentri ancje il cors di lauree in siencis infermieristichis e il dipartiment di siencis economichis e statistichis de Universitât di Udin par svilupâ i moments informatîfs e valutâ la eficacie dal progjet. Ae prime fase dal progjet a vevin partecipât massime feminis (77% dal totâl) e, par chel che al rivuarde la fasse di etât, personis tra i 65 e i 69 agns (41%). Il progjet “CamminaMenti”, cemût che al à ricuardât il sindic Furio Honsell, al à chê di meti in moviment prin di dut lis funzions cognitivis in maniere di judâ la prevenzion e di promovi un invecjament in salût. Par plui informazions si pues contatâ l’ufici “Citâts Sanis” dal Comun di Udin (0432 271384/271485 o healthy.cities@comune.udine.it), ma ancje il servizi “No alla Solit’Udine” (numar vert 800 201911), la associazion “Alzheimer” (0432 25555 e alzheimer.udine@libero.it), la cooperative “Pervinca” (0432 1740123 e pervinca.b@libero.it) o la associazion “Judinsi” (0432 233756 e judinsi@alice.it).