Consei comunâl straordenari su lis liniis di svilup di Amga

Un Consei comunâl straordenari al è stât clamât dongje ai 9 di Zenâr par discuti, confrontâsi e lâ plui a fonts su lis liniis strategjichis di Amga. A domandâlu al è stât il sindic Furio Honsell, che al à za otignût la disponibilitât de bande dal president dal Consei comunâl Carmelo Spiga. Honsell al à declarât che cualsisedi decision sul avignî di Amga e à di passâ pe assemblee citadine e che nissun al à mai pensât di lassâ fûr il Consei di un percors cussì impuartant pe citât e pai passe 250 dipendents de societât partecipade. Il vicesindic Carlo Giacomello al à ricuardât che la convocazion dal Consei comunâl e jere un passaç za previodût intal cronoprogram dal percors, compagn di ce che si veve fat pe cession de rame aghe dal Cafc.