Bant su la inovazion di Cjamare di Cumierç e Comun

Il sindic e l’assessôr pe inovazion dal Comun Furio Honsell e Gabriele Giacomini, il president de Cjamare di Cumierç di Udin Giovanni Da Pozzo, e il diretôr di Friuli Innovazione Fabio Feruglio a àn sotscrit vuê la convenzion par un bant pes impresis inovativis che al sarà viert fintremai i 28 di Fevrâr e che i siei contignûts a son za disponibii alì dal sît internet www.ud.camcom.it . Il bant al previôt un stanziament complessîf di 240 mil euros, 200 mil metûts de Cjamare di Cumierç e 40 mil dal Comun. I contribûts a son indreçâts aes impresis piçulis e mezanis che a son logadis in provincie di Udin che a vedin partecipât a progjets imbastîts di organisims incubadôrs tant che Friuli Innovazione pal svilup di impresis inovadoris. Lis “start up” interessadis a partecipâ ae cuote metude a disposizion dal Comun, in plui des carateristichis domandadis par acedi ai contribûts, a varan di presentâ progjets che van daûr di liniis specifichis che si adatin ae citât di Udin. I contribûts a puedin cuvierzi il 70% des spesis ricognossudis, di un minim di 17 mil a di un massim di 30 mil euros. Pal sindic Honsell la iniziative e vûl jessi une iniezion di fiducie tai confronts dai zovins.