Riorganizazion dai servizis di agregazion dal Comun

Dopo de consultazion cui responsabii des associazions e dal personâl dal Comun impegnâts intes politichis pai zovins, la Aministrazion comunâl e à decidût une riorganizazion organiche dai servizis di agregazion dal Comun. Une operazion là che, tra il Mai dal 2014 e il Jugn dal 2016, l’esecutîf di Palaç D’Aronco al metarà cuasi 400 mil euros. A son cuatri lis azions decidudis. La prime si clamarà “Idea Pig” (Improvement, Development, Empowerment for Aurora – Punto Incontro Giovani), e sarà centrade sul cuartîr Aurora e si indreçarà massime ae fasse di etât tra i 10 e i 25 agns cun chê di sburtâ i fruts e i fantats a cjatâsi intal lôr timp libar alì dal Pont Incuintri Zovins par incressi lis lôr competencis sociâls e civichis e vê indreçaments pe formazion e pal lavôr. Une altre novitât e sarà “Polis” (Piattaforma Operativa di Laboratori di Innovazione Sociale) che si propon di saborâ la capacitât dai grups zovanîi di progjetâ azions inovativis par miorâ i leams di comunitât. “Oggi” (Officine Giovani per Giovani Innovatori) e je invezit la azion pensade par judâ i fruts e i fantats tra i 11 e i 30 agns a dâsi dongje pe gjestion des Oficinis Zovins. In fin, “Asset” (Area Scuole Secondarie, Educazione e Tecnologie) e sarà la azion educative alì des scuelis secondariis di secont grât de citât par compagnâ i students intune riflession sul svilup de lôr identitât e sul ûs atent des gnovis tecnologjiis.