Convenzion cu la Universitât, 40 tirocinis in Comun

Il Comun e la Universitât dai studis di Udin a àn firmât vuê, martars ai 14 di Zenâr, une convenzion par ativâ, tra 2014 e 2015, cuarante tirocinis pai students dal ateneu furlan che si davuelzaran alì de aministrazion comunâl. Si trate di percors formatîfs – lavoratîfs che a duraran sîs mês cun vincj oris par setemane. Cui che al sarà sielzût par chestis ativitâts al cjaparà une indenitât mensîl di 300 euros che a rivin di un stanziament dal Comun che, pal 2014, al met a disposizion in dut 36 mil euros. La Universitât, invezit, e varà di viodi de cuviertidure assicurative Inail e pe responsabilitât civîl e gjestî lis selezions par acedi ai puescj. I 40 tirocinis – 20 in program chest an e 20 chest an che al ven – a saran vierts a cui che si è laureât inte Universitât di Udin di no plui di dodis mês. I compits assegnâts a saran avonde variâts: si larà, par esempli, dal svilup dal sît internet gnûf dal Comun ae catalogazion dai manuscrits de biblioteche, de informatizazion dal archivi de edilizie privade al svilup di progjets educatîfs. In gracie di cheste iniziative, al à comentât il sindic Furio Honsell, si permetarà ai zovins di sperimentâ in maniere direte la realtât di une aministrazion publiche inte suaze di un percors formatîf che al podarà jessi une vore util dal pont di viste dal indreçament professionâl. In plui dal prin citadin udinês, ae firme de convenzion a jerin il retôr Alberto De Toni e l’assessôr pe inovazion Gabriele Giacomini.