Al cres il numar dai “nonos vigjii” dal Comun

Si è slargjade la scuadre dai “nonos vigjii” dal Comun. Cun di fat, cu la viertidure des scuelis dopo des vacancis di Nadâl, a son jentrâts in servizi sîs volontaris pe sigurece gnûfs che a son lâts a zontâsi cui cinc che a jerin za in vore. Dôs lis ativitâts principâls che a puartin indenant, ven a dî controlâ lis jentradis des scuelis e cierts passaçs stradâi in ocasion di manifestazions e di events. Ta cheste maniere si permet ae polizie locâl di jessi impegnade par altris servizis sul teritori. Chel dal volontari pe sigurece al è un servizi di utilitât sociâl, davuelt in forme ocasionâl e gratuite. Lis domandis di adesion par chest servizi a puedin jessi presentadis dôs voltis ad an, intal mês di Fevrâr e ta chel di Avost.