Miercus si presente ae Joppi un inedit di Maniacco

Cul poeme di Tito Maniacco “Il guardiano del faro”, che al sarà presentât miercus ai 22 di Zenâr a sîs sot sere alì de sale Corgnali de Joppi, la biblioteche civiche comunâl e scree une gnove golaine editoriâl batiade “Manoscritti letterari”. Il libri al è stât recuperât dal font dai manuscrits che al è stât lassât ae biblioteche dopo de muart dal grant inteletuâl furlan. Ae presentazion a parteciparan l’assessôr comunâl pe culture, Federico Pirone, il diretôr de Joppi, Romano Vecchiet, la scritore Marina Giovannelli e l’atôr Fabiano Fantini che al leiarà cualchi slambri dal poeme di Maniacco.