Joibe incuintri cu la Sorintendente pai bens architetonics

Al è in program joibe ai 22 di Zenâr l’incuintri tra la Sorintendente pai bens architetonics e dal paisaç dal Friûl – Vignesie Julie, Maria Giulia Picchione, e la Aministrazion comunâl udinese rapresentade dal sindic Furio Honsell e dal assessôr Enrico Pizza. Al centri dal incuintri a saran i intervents che a integnin place S. Jacum, des oparis di manutenzion ordenarie ai intervents par difindi lis oparis za restauradis, fin ae pedane par permeti ai disabii di vê acès ae part centrâl de place. Cu la Sorintendente si larà a planificâ chescj intervents – al à spiegât Honsell – e si resonarà su lis alternativis ai dissuasôrs che si veve za tacât a meti jù par evitâ che i veicui si fermassin par operazions di caric e scaric di marcjanziis juste su lis lastris di piere a pene restauradis.