Prin pas pal telelavôr dai dipendents comunâi

Il Comun di Udin si zonte a chês pocjis aministrazions publichis che intal stât talian a àn za previodût pai lôr dipendents la pussibilitât di doprâ il telelavôr. Inte sô riunion dai 21 di Zenâr, di fat, la Zonte e à fat bon il regolament che al permetarà a cualchidun dai siei dipendents di podê lavorâ di cjase. Si trate di un sisteme che al permet ai dipendents di integrâ miôr i siei timps di lavôr cun chei de sô vite privade e, intal stes timp, al jude lis aministrazions di sparagnâ sui coscj fis di gjestion des sedis e dal lavôr in ufici. L’acès a chest sisteme di lavôr al sarà regolât di criteris specifics e al dipent de pussibilitât di rivâ a misurâ i risultâts dal lavôr davuelt. Intal assegnâ i puescj si tignarà ancje cont di situazions di disabilitât psicofisiche dal lavoradôr, de presince di fîs sot dai trê agns che si à di viodi di lôr, o di cundizions di disabilitât di cualchidun de famee che a domandin une assistence continuade. “Il regolament gnûf – e à spiegât la assessore Cinzia Del Torre – al jentrarà in vore ad in plen intal 2015, ma za cun chest an si podaran inviâ i prins progjets sperimentâi di telelavôr.”