Autoparc in Zardin Grant, finide la prime part dai lavôrs

E je finide la prime part dai lavôrs par fâ sù il gnûf parc machinis sot tiere in Zardin Grant. Cun di fat îr la imprese Vidoni e à metût jù l’ultin dai 303 pâi che a fasaran di fonde al autoparc. Pal sindic, Furio Honsell, si trate di un passaç une vore impuartant par lâ indenant cuntun cantîr strategjic pe citât, ma ancje pe economie de citât e dal Friûl. Al è impuartant che a ledin indenant i lavôrs par cheste opare – al à spiegât il prin citadin – ancje parcè che intune fase dulà che no si puedin cuasi plui fâ lavôrs publics, intervents come chest a dan une oportunitât di judâ la economie e lis impresis. Il prin lot al è lât indenant par 4 mês e i disasis causâts in particolâr al Sello si son ridusûts.