Cjistiel viert e siôr di apontaments ai 2 di Fevrâr

Domenie ai 2 di Fevrâr, di dîs di buinore fintremai sîs sot sere, la culine dal cjistiel i darà acet a plui di trente apontaments metûts adun dal Comun cu la colaborazion di cetancj tra ents e e associazions ativis sul teritori: si va des visitis didatichis ai events dedicâts ai fruts, des leturis animadis ai spetacui di teatri e tant altri ancjemò. La manifestazion, batiade “La cjapade dal cjistiel”, e je stade pensade dai Museus civics e dal Assessorât pe culture par meti in mostre ce che di miôr che si à in citât. I prins doi apontaments a tacaran a dîs e mieze di matine: un cu lis “flabis a mirinde” di Anà-Thema Teatro alì de sale zûc dal Museu archeologjic e chel altri cuntune conversazion dedicade ae lûs e al colôr inte piture veneziane tignude di Linda Borean alì de Galarie di art antighe. Po lis iniziativis a laran indenant une daûr di chê altre fintremai sîs sot sere puartant il public dal salon dal Parlament aes presons dal cjistiel, de glesie di Sante Marie ae Cjase de fradaie, dal Museu archeologjic a chel de fotografie. Il programe complet de zornade cun ducj i lûcs e i oraris dai apontaments si pues cjatâju sul sît internet www.udinecultura.it o alì dal PuntoInforma in vie Savorgnane. “Cun cheste iniziative – al spieghe l’assessôr pe culture Federico Pirone – si vûl che Udin al torni a cjapâ in man in maniere simboliche il so cjistiel e si vûl mostrâ un mût gnûf par slargjâ la culture e lis ricjecis dai museus citadins leant lis variis dissiplinis artistichis, valorizant i talents dai zovins e riclamant gjenerazions diviersis intun lûc simbul che al met adun il passât, il vuê e l’avignî”.