Vot puescj in Comun pal servizi civîl solidari

Vot puescj par ufrîi a fantatis e fantats di 16 e 17 agns residents in Friûl – Vignesie Julie la pussibilitât di fâ une prime esperience intal mont dal lavôr e de aministrazion publiche. A son chei dai progjets che il Comun al à fat indenant inte suaze dal bant regjonâl pal servizi civîl solidari. I puescj a son previodûts dai cuatri progjets presentâts de aministrazion comunâl e che a son in spiete di jessi fats bogns de Regjon. Doi puescj a saran a disposizion alì dal PuntoInforma dal Comun, altris doi alì dai uficis che a viodin dal progjet “Citâts Sanis” e chei altris cuatri a saran dividûts tra Ludoteche comunâl, Ludobus, “Punto Incontro Giovani” e “Officine Giovani”. L’impegn domandât al sarà par solit di 4/5 oris in dì. La Regjon e darà un mensîl al volontaris e e viodarà ancje de cuviertidure sigurative.