Servizis sociâi: relazion su lis ativitâts dal 2013

Meti dongje sinergjiis e ridusi lis disfunzionalitâts. A son chescj i prins obietîfs di cirî di vê pe Assessore pe salût Simona Liguori e pe Assessore ae inclusion sociâl Antonella Nonino che îr di sere a àn partecipât ae riunion de Comission Politichis Sociâls là che al è stât presentât il belanç di ducj i intervents fats vie pal 2013. Il Comun di Udin al à stanziât in dut 800mil euros par intervents di caratar economic par judâ lis personis plui in dificoltât: dai contribûts par sbassâ la Tares ai fonts pai afits. In dut a son stadis fatis buinis 130 domandis pai assegns di maternitât, 240 par fameis cun trê fîs piçui, 3 mil 690 pe cjarte famee in maniere di vê acès ai contribûts regjonâi pe energjie eletriche e pal gas. A chescj si zontin altris 314 mil euros dâts fûr tant che assegn di natalitât regjonâl, cun 431 domandis licuidadis par nassitis e adozions. A son stadis po dopo 585 lis fameis che a àn podût gjoldi des facilitazions tarifaris sui servizis di ristorazion scolastiche e di doposcuele, intant che sul front dai afits son stadis licuidadis 290 domandis su 1897 ametudis a contribût. Cul progjet No alla SolitUdine a son stadis fatis buinis lis domandis di passe 4 mil personis dome tai prins sîs mês dal 2013.