Contribût par paiâ la Tares

Al è timp fin ai 28 di Fevrâr par presentâ domande di contribût al Comun pal paiament de Tares, la tasse su lis scovacis. Di fat, ancje chest an, la Aministrazion comunâl e à confermât un finanziament di 180 mil euros par fâ front al paiament de tasse. Lis domandis a àn di jessi presentadis alì dal Sportel informatîf dai servizis sociâi (SISSU) di vie Micesio 31. A puedin gjoldi dal contribût lis personis cuntun Isee che nol passe i 818,40 euros e che no àn fat domande o no àn gjoldût dal contribût Tia pal 2012. Pal 2013 il contribût al cuvierzarà la prime rate de Tares, ven a stâi l’80% dal totâl, intant che la seconde rate e restarà a caric dai contribuents. Il SISSU di vie Micesio al è a disposizion par cjapâ sù lis domandis il lunis, il miercus e la joibe di nûf mancul un cuart di buinore a misdì e un cuart (8.45 – 12.15) e al sarà viert ancje vinars ai 28 di Fevrâr simpri cul stes orari. I modui par presentâ la domande a son disponibii alì dal SISSU, sul sît internet dal Comun, intai uficis anagrafics di vie Stringher 14 e intes sedis des Circoscrizions.