Adesion inmò plui fuarte dal Comun a M’illumino di meno

Ancje chest an il Comun di Udin al aderìs ae campagne “M’illumino di meno”, inmaneade de trasmission “Caterpillar” di Radio2. Vinars ai 14 di Fevrâr, a tacâ di sîs sot sere e indenant par dute la gnot, lis lûs dal cjistiel e dai monuments di place Libertà a saran distudadis. “Cun di fat – al à spiegât l’assessôr pal ambient, Enrico Pizza – chest an o vin volût dâ un segnâl ancjemò plui fuart di adesion ae iniziative cul slungjâ lis oris che lis lûs a restaran distudadis”. Il Comun al parteciparà al event ancje cu la Ludoteche comunâl che intal dopodimisdì, di cinc fin sîs (17.00-18.00), e propon la iniziative “M’il-lumìno di più”: un laboratori par preparâ lumins che a saran po “liberâts” intal lagut dal zardin dal Tors. Altris iniziativis leadis ae campagne a saran po svilupadis de biblioteche civiche “Joppi”, dal circul Legambiente di Udin e di aBicitUdine.