Disponibii i contribûts pes boletis des scovacis

Al è timp fin ai 17 di Zenâr par presentâ la domande di acès ai contribûts pes spesis leadis ae bolete des scovacis, une misure par judâ lis fameis in cundizions di disasi economic confermade de aministrazion comunâl in gracie di un finanziament di 100 mil euros. A puedin gjoldi dal contribût i residents intal comun titolârs di une utence Tia e in possès di une atestazion Isee in cors di validitât che no passi i 8.012,13 euros. Lis domandis a puedin jessi presentadis al sportel unic informatîf dai servizis sociâi, logât intal Centri polifunzionâl Micesio, a puedin jessi inviadis cuntune racomandade o pûr vie pueste eletroniche certificade al ufici protocol dal Comun ( protocollo@pec.comune.udine.it ) dentri di cinc mancul un cuart dal dopodimisdì (16.45) di joibe ai 17 di Zenâr. Il bant e la modulistiche a son disponibii sul sît dal Comun www.comune.udine.it, ma ancje alì dal Centri polifunzionâl Micesio, intai uficis comunâi de anagrafe, in vie Stringher 14 – vie Beato Odorico, al PuntoInforma di vie Savorgnane, intal pont Amco logât inte autostazion, e intes circoscrizions citadinis.