Cinc zornadis di divertiment cul Carnevâl udinês

Ancje chest an il Carnevâl udinês al ven compagnât de manifestazion “Costumi e sapori del mondo”, inmaneade de societât Flash adun cul Comun, che jenfri joibe ai 27 di Fevrâr e domenie ai 2 di Març e proponarà goloseçs e prodots artesanâi tipics tra place Libertà, vie Cavour e plaçute Belloni. La scree, joibe a cuatri dopomisdì, e viodarà ancje la esibizion di un grup di sbandieradôrs toscans. Vinars e sabide, in place Libertà si varan cetantis ocasions di zûc e di divertiment, massime pai plui piçui. Tal dopomisdì di sabide si varan po moments di divertiment ancje in place S. Jacum cui zovins de Crôs Rosse e in place dai Grans cul apontament “Tutti in maschera!”. Domenie ai 2 di Març a trê e mieze dopomisdì in place Libertà e torne “La pesata delle mascherine più belle”, che e premie i vincidôrs cun chilos di caramelis. La stesse zornade, a undis e mieze di matine, pes stradis dal centri si varà la sfilade Berimbau. A cinc dopomisdì, alì dal auditorium Menossi, si varà il spetacul teatrâl “E se fos vere?” de compagnie “Buine Blave” di Mortean. Zûcs e divertiments si ju cjatarà po ancje in Ludoteche e tes bibliotechis citadinis. Par sierâ il Carnevâl, martars ai 4 di Març, in place S. Jacum a trê dopomisdì si varà il “Reverly Circus”.