In Març e torne la fieste dal Pi grêc

Dopo dal sucès des edizions stadis, ancje chest an a Udin e torne la “Fieste dal Pi grêc”, apontament che ogni 14 di Març e celebre la sience e la matematiche. Pal sest an di file il Comun, in colaborazion cun ents, associazions e scuelis dal teritori, al aderìs a cheste manifestazion par promovi il studi de matematiche cuntun program siôr di events a jentrade libare che si davuelzaran dal prin ai 15 di Març in diviers lûcs dal centri citadin. “Chest an – e spieghe la assessore pal sport, pe educazion e pai stîi di vite, Raffaella Basana – o pontìn ancje a sensibilizâ e a fâi cuintri al zûc di azart”. A vierzi lis celebrazions dal Pi grêc a saran i doi apontaments “Impariamo l’Othello” in program sabide 1 e miercus ai 5 di Març. No mancjaran nancje moments dedicâts ae ativitât fisiche tant che la “Pi Run – Corse dal Pi grêc”, stafete om – femine sui 3,14 km, o la cjaminade a pas libar dal Pi grêc in program ai 8 di Març al parc Moretti. La manifestazion e jentrarà intal vîf ai 13 di Març cu la gare a scuadris di matematiche, intant che vinars si varà la gare mnemoniche di Pi grêc. Il program complet de manifestazion si lu cjatarà in curt sul sît internet dal Comun.