Ai 8 di Març e jentre intal vîf Calendidonna

Sabide ai 8 di Març, Zornade de femine, e jentre intal vîf Calendidonna, la manifestazion inmaneade dal Comun di Udin sul univiers feminin che chest an e je dedicade al moviment di proteste Femen. Ai 8 di Març, a cinc dopomisdì (17.00) alì dal Oratori dal Crist lis gjornalistis e scritoris Renata Pisu, Vanna Vannuccini e Nabila Zayati, za ospitis di Calendidonna intes edizions dedicadis ae Cine, al Iran e aes rivoltis intai paîs dal Sud dal Mediterani, a ricjaparan i fîi di chei discors par contâ ce che al è sucedût di in chê volte indenant. Simpri sabide, ma a nûf di sere (21.00) il teatri Palamostre i darà acet a Elena Ledda, protagoniste de cjançon sarde, che e proponarà “Amaius. Contos de oi cun sa maia de aturus tempus”, un viaç poetic e musicâl inmaneât in gracie dal lavôr dal Circul dai Sarts “Montanaru” e dal Teatro Club. Intal spetacul, tant che omaç aes feminis furlanis, si varà ancje la partecipazion di Nicoletta Oscuro. La ativitât des feminis inte lote antifassiste e inte Resistence al sarà invezit il teme al centri de conference “Le rose di Ravensbrück” in program vinars ai 7 di Març a sîs e mieze sot sere (18.30) in sale Ajace.