Amga-Hera, documents a disposizion dai conseîrs

Cun lunis ai 10 di Març, la Zonte e met a disposizion dai conseîrs comunâi dute une schirie di documents sul percors de propueste di fusion tra Hera e Amga in maniere che si puedi rivâ par timp al esam dal progjet. Tra i documents che a saran metûts a disposizion – al spieghe il sindic Furio Honsell – si à la analisi comparative fate di une des plui impuartantis societâts internazionâls di consulence strategjiche aziendâl su lis diviersis opzions pal avignî di Amga e duncje ancje cun risis, vantaçs o vincui leâts ae fusion cun Hera e a chês altris stradis pussibilis. In plui, i conseîrs a varan la pussibilitât di viodi ancje l’acuardi industriâl e il pat parasociâl tra Comun di Udin e Hera, la letare di specifiche su la clausule di difese de ocupazion, lis relazions dal CdA di Amga e altris documents ancjemò.