Campagne pe racuelte dai vuelis vegjetâi doprâts

Il Comun e la Net a dopraran i bêçs dal premi dât fûr de Provincie aes aministrazions plui ativis intal riciclâ par inviâ une gnove campagne pe racuelte dai vuelis vegjetâi doprâts. Se dispierdûts intal ambient i vuelis a incuinin une vore, ma se si riciclin a permetin di produsi combustibii alternatîfs a chei tradizionâi. La iniziative, che e je stade presentade vuê, e previôt la assegnazion in ûs gratuit ai citadins che ju domandaran di 3.247 bussulots di 3 litris e mieç pal recupar dai vuelis vegjetâi doprâts in cjase par fâ di mangjâ. I bussulots a puedin jessi ritirâts alì de sede operative de Net, in vie Gonars 44, intant che pe consegne dai vuelis doprâts si varà di lâ alì dai centris di racuelte di vie Rizzolo e di vie Stiria. In dì di vuê, in comun di Udin, si cjapin sù 12 toneladis di vuelis vegjetâi doprâts ogni an e, cun cheste campagne, si ponte a incressi ancjemò di plui chest dât.