Si slargje la cabladure in fibre otiche de citât

Si pues descrivi tant che une vere autostrade digjitâl chê che il Comun al è daûr a meti in pîts cun Telecom Italia, o sei la cabladure in fibre otiche che e metarà sù la rêt Ngan (Next generation access network). “Dopo vê triplicât lis areis de citât cuvierzudis dal wi-fi public citadin – al spieghe l’assessôr pe inovazion, Gabriele Giacomini – cumò o lin a triplicâ ancje la velocitât che i citadins e lis impresis a podaran navigâ intal spazi virtuâl de Rêt e profitâ cusì des oportunitâts ufiertis de rivoluzion digjitâl e telematiche che o sin daûr a vivi”. La cabladure e interesse lis sîs centrâls Telecom Italia che a cuvierzin il teritori citadin e si svilupe par un totâl di sù par jù 240 chilometris di fibre. La rêt Ngan e permet di dâi al utent une velocitât di conession di 30 Mbit al secont e in prospetive e permetarà l’ûs di servizis ultrabroadband. Dopo vê puartât insom i lavôrs intes centrâls dal centri di Udin e de aree di Cjavrîs, di chi ae fin dal 2015 si larà a completâ la cabladure des centrâls logadis in Baldasserie, a S. Domeni, su viâl Venezia e a S. Gotart. Cun chê di garantî sigurece e impat ambientâl minim, l’intervent si poie in buine part su lis infrastruturis che za a son. Chest al permet ancje di evitâ plui dal 65% dai sgjâfs che a varessin coventâts. Par chest progjet la aministrazion comunâl e à invistît in dut 2 milions di euros.