Postazions ancje tes bibliotechis pes iscrizions a scuele

Vot gnovis postazions internet a saran a disposizion dai citadins sore nuie in vot bibliotechis circoscrizionâls dal Comun di Udin in graciis dal progjet Pasi, finanziât de Regjon. La disposizion dal Ministeri talian pe istruzion che e previôt che lis iscrizions aes primis classis des scuelis statâls pal an scolastic 2013/14 a sedin fatis dome vie internet dai 21 di Zenâr ai 28 di Fevrâr, e je daûr a meti in dificoltâts lis fameis che no son indotadis dai struments informatics, no àn une conession internet adate o no son usâts aes tecnologjiis digjitâls. Par cheste reson, dongje des azions che lis scuelis a son daûr a meti in vore par superâ i disasis causâts di chest proviodiment, il Comun al met a disposizion ancje lis bibliotechis circoscrizionâls. Lis postazions a son ativis intes bibliotechis de prime, seconde (vie Joppi e vie Martignà), tierce, cuarte, cuinte, seste e setime circoscrizion là che i utents a àn a disposizion ordenadôrs, scansionadôrs e stampantis. Cun di plui si lavore ancje par meti sù un grup di volontaris disponibii par dâ une man inte operazion. Par chest la biblioteche civiche “Joppi” e domande aes personis interessadis di dâ la lôr disponibilitât cuntune mail ae direzion di pueste eletroniche marzia.plaino@comune.udine.it. Par doprâ e par regjistrâsi al servizi e covente la cjarte regjonâl dai servizis.