Vie libare de Zonte pe fusion Amga-Hera

La Zonte comunâl e à fate buine la delibare su la fusion tra Amga Multiservizi e Hera Spa. Pal vie libare definitîf il proviodiment al passarà cumò al esam dal Consei comunâl. I vantaçs pal teritori, al à dite il sindic Furio Honsell, a van des jentradis fiscâls che a restin in regjon ae pussibilitât di slargjâ il podê di acuist al ingrues des materiis primis e fintremai a di une cualitât miôr dal servizi. A chest si à di zontâ il rûl dal Comun di Udin tant che invistidôr di lunc tiermin intal setôr dai servizis publics locâi e il slargjament des prospetivis di lavôr par efiet de creazion a Udin de division distribuzion gas de societât par dut il teritori regjonâl.