Tirocinis in Comun, incuintri cui prins 17 selezionâts

A tacaran a vore tes prossimis setemanis i prins 17 zovins selezionâts de aministrazion comunâl inte suaze di une convenzion cu la Universitât dai studis di Udin. L’acuardi al permet di ativâ, tra 2014 e 2015, cuarante tirocinis pai students dal ateneu furlan che a puartaran indenant percors formatîfs – lavoratîfs che a duraran sîs mês cun vincj oris di lavôr par setemane. I fantats selezionâts a àn vût un prin incuintri di benvignût cul assessôr comunâl pe inovazion Gabriele Giacomini vuê di buinore a palaç D’Aronco. Ai zovins che a parteciparan i sarà dade une indenitât di 300 euros al mês, cuvierts cun 36 mil euros metûts a disposizion dal Comun. La Universitât, invezit, e viodarà de cuviertidure assicurative Inail e pe responsabilitât civîl. I fantats a lavoraran in cjamps diferents: si va de planificazion teritoriâl aes politichis di gjenar, dai progjets europeans aes politichis pai zovins, dal sportel unic pes ativitâts produtivis ai museus civics. In gracie di cheste iniziative, al à spiegât il sindic Furio Honsell, si permetarà ai zovins di sperimentâ in maniere direte la realtât di une aministrazion publiche inte suaze di un percors formatîf che al podarà jessi une vore util dal pont di viste dal indreçament professionâl.