Ativâts i gnûfs ponts wi-fi de rêt Udinefree

Dopo di place dai Grans / XX settembre e place Libertà, a cressin i lûcs di Udin là che in gracie de rêt wi-fi si podarà conetisi a internet sore nuie. La presentazion e la ativazion dai ponts wi-fi si le à vude vuê di buinore cuntune cerimonie in place S. Jacum / Matteotti là che a àn partecipât ancje il sindic Furio Honsell e l’assessôr pe inovazion Gabriele Giacomini. I ponts gnûfs de rêt “Udinefree” si cjatin sul splaç dal cjistiel, in vie Cavour alì dal cjanton su plaçute Lionello, in place S. Jacum, in plaçute Marconi denant de biblioteche, dentri de biblioteche stesse, te cort di palaç Morpurgo, in place Venerio e alì di zardins dal Tors. Par acedi al servizi internet gratuit bastarà une regjistrazion là che al sarà domandât dome il numar di celulâr. Po cun smartphone, tablet o notebook si podarà navigâ par un massim di dôs oris e di 300Mb di dâts discjariâts in dì. Cu lis prossimis setemanis la rêt “Udinefree” e sarà federade cu lis rêts “FreeItalia wi-fi”, “Eduroam” e “Idem-Garr” slargjant i lûcs dulà podê navigâ sore nuie cence bisugne di tornâ a regjistrâsi.