E torne Biomovies, documentaris su nature e biodiversitât

A tacâ dal prin di Avrîl al torne Biomovies, la rassegne di film a teme naturalistic proponûts dal Museu Furlan di Storie Naturâl dal Comun, in colaborazion cun CEC, Sondrio Festival, Arpa FVG e LaRea. I documentaris che a vignaran mostrâts chest an a frontaran ducj la cuistion de biodiversitât, cun aprofondiments ae mostre Biodiversitas che a je stade metude sù alì de ex glesie di San Francesco fin ai 27 di Avrîl. Dutis lis proiezion a si davuelzaran come simpri tal cine Visionario e a saran compagnadis de presentazion dai operadôrs dal museu. Il prin apontament al è duncje par martars ai 1 di Avrîl aes 8 e mieze cul documentari “La Palude” di Jan Haft. La seconde proiezion a je fissade par martars ai 8 di Avrîl, simpri tal stes orari, cun doi documentaris: “La natura in palmo di mano” di Diego Cenetiempo e “Il migliore dei mondi possibili” di Marco Andreini e Paolo Fioratti. Ducj i apontaments a viodaran la introduzion di Massimo Buccheri, Luca Dorigo, Manuela Govannelli e Paolo Glerean dal Museu di Storie Naturâl, cu la presince pal 8 di Avrîl di Sergio Sichenze dal LaRea.