Domandis di acès pal font afits fin ai 28 di Avrîl

Al è timp fintremai i 28 di Avrîl par acedi al font afits, la misure che e jude cu lis spesis pe locazion lis fameis che si cjatin intune situazion economiche dificile. A puedin domandâ il contribût, riferît al an 2013, lis fameis che a àn la residence in comun di Udin, che a àn un contrat di afit e che, intal moment de domande, a àn: une residence di almancul 24 mês in Friûl – Vignesie Julie, plui di 18 agns di etât, un nivel di redit che al è dentri di chei previodûts dal regolament regjonâl, no vê un alozament di proprietât, no vê in assegnazion un alozament ATER. “Par favorî plui che si pues i citadins – e spieghe la assessore Antonella Nonino – si à metût sù, alì dal centri Micesio, un sportel di pueste dedicât ae compilazion informatiche cul jutori di un operadôr”. Par presentâ la domande al covente prime prenotâsi sul sît www.comune.udine.it e lâ daûr des istruzions dadis. Il bant e il modul de domande si ju cjate ancje chei sul sît internet dal Comun, ma ancje alì dal SISSU, des Circoscrizions, dai uficis de anagrafe, dal sportel PuntoInforma e dal sportel Punto A.M.I.C.O. La Aministrazion comunâl e à ancje fat bon il bant a pro dai proprietaris che a vuelin meti a disposizion alozaments che no jerin fitâts a fituâi cuntun nivel di redit bas.