Gnovis areis par fâ cori libars i cjans

Une aree gnove dute centade e dome pai cjans, trê spazis libars e doi zardins centâts dedicâts ancje ai cjans in libertât, ma dome in ciertis fassis oraris. La gnove mape des areis là che i cjans a podaran movisi cence sguinçâl e musarole e je stade cjapade ta chestis zornadis de Aministrazion comunâl. In dì di vuê a Udin a jerin dome dôs lis areis par fâ cori libars i cjans, une logade alì dal parc citadin ad ôr di vie della Roggia e une su viâl dello Sport dongje dal implant sportîf “Centazzo”. In citât però si stime che a sedin sù par jù 10 mil cjans e cu la viertidure di gnovis areis par lôr si ven incuintri a di une domande une vore sintude di ducj chei a àn cjans. Ancje ta chestis areis, dut câs, e reste simpri la responsabilitât dai proprietaris sei di tignî netât, sei in câs di dams causâts dai animâi. Dentri dal Astât si vierzarà la aree di vie Marsala, dentri dal ex vivâr comunâl. Invezit chês altris zonis pai cjans a saran inviadis in vie sperimentâl fin ai 31 di Dicembar. Si fevele di trê areis simpri disponibilis, ma no centadis: une alì di Cascina Mauroner in vie Divisione Garibaldi Osoppo, une alì des viis De Orlandi e Pellis, e la tierce alì des viis Ramandolo e Tolmezzo. Invezit intal zardin centât “Cariplo”, tra vie Carducci e vie Gorghi, e alì dal zardin didatic di vie Zugliano, i cjans a podaran movisi libars ma dome in cierts fassis oraris, ven a dî: dal prin ai 30 di Avrîl e dal prin ai 31 di Otuba tra vot e nûf di buinore (8.00-9.00) e tra sîs e siet sot sere (18.00-19.00), dal prin di Mai ai 30 di Setembar di siet a nûf di buinore (7.00-9.00) e di vot a nûf di sere (20.00-21.00) e, dal prin di Novembar ae fin dal an, tra vot e nûf di buinore (8.00-9.00) e tra cinc e sîs sot sere (17.00-18.00).